Hoewel net 7% van ‘n mens se liggaamsgewig uit bloed bestaan, is dit sekerlik een van die intersantste én belangrikste snelweë wat deur die liggaam kronkel. Benewens rooibloedselle (wat suurstof vervoer), witbloedselle (wat ons teen virusse, bakterieë en ander indringersiektes beskerm) en bloedplaatjies (wat hoofsaaklik bloeding keer), bestaan 55% van ons bloed uit plasma.
Wat is plasma presies?
Wanneer ons bloed in die verskillende produkte geskei word, kan die plasma duidelik as ‘n gelerige of strooikleurige vloeistof onderskei word. Plasma bestaan uit ongeveer 92% water wat help om die bloedvate te vul sodat bloed en voedingstowwe vrylik deur die liggaam kan beweeg. Die oorblywende 8% van plasma bevat verskeie sleutelstowwe soos proteïene, immunoglobulien en elektroliete.